Jurgen Klopp, stjóri Liverpool, kvartaði yfir leikmönnum Paris Saint-Germain eftir leik liðanna í gær.

Klopp var óánægður með hversu auðveldlega leikmenn PSG fóru í grasið og voru þá duglegir að biðja dómarann um hjálp.

Leikmenn Liverpool fengu sex gul spjöld í 2-1 tapi í gær og vildi Klopp meina að dómarinn hefði tekið of hart á sínum mönnum.

Thomas Tuchel, stjóri PSG, hefur nú svarað Klopp og segist skilja af hverju hann vilji ekki tala um leikinn sjálfan.

,,Þegar ég tapa stórleikjum þá er ég reiður og stundum tala ég um hluti bara til að taka athyglina af liðinu,“ sagði Tuchel.

,,Ég geri þetta líka en þetta er ekki mitt vandamál. Þið verðið að spyrja Jurgen, ég heyrði að hann væri með sínar skoðanir sem er í fínu lagi.“