Lið KA ætlar sér stóra hluti næsta sumar í Pepsi-deild karla undir stjórn Óla Stefáns Flóventssonar.

Fyrr í dag var greint frá því að Haukur Heiðar Hauksson væri á heimleið eftir dvöl hjá AIK í Svíþjóð.

Haukur spilaði með KA frá 2008 til 2011 áður en hann samdi við KR. Hann varð svo sænskur meistari með AIK fyrr á þessu ári.

Mbl.is greinir nú frá því að tveir aðrir leikmenn séu einnig á leið heim til Akureyrar.

Leikmennirnir eru þeir Andri Fannar Stefánsson og Almarr Ormarsson sem þekkja vel til félagsins.

Andri kemur til KA frá Íslandsmeisturum Vals en bakvörðurinn spilaði aðeins tvo leiki með liðinu í Pepsi-deildinni í sumar. Hann hóf meistaraflokks feril sinn með KA.

Almarr mun þá skrifa undir frá Fjölni en hann lék 20 leiki með liðinu í sumar sem féll úr efstu deild.

Almarr er einnig uppalinn hjá KA og lék með liðinu frá 2005 til 2008 og svo aftur frá 2016 til 2017.