Radamel Falcao mætti fyrrum félagi sínu Atletico Madrid í kvöld er Monaco mætti til Spánar.

Falcao hefur undanfarin ár gert góða hluti með Monaco en hann lék í tvö ár með Atletico frá 2011 til 2013.

Hann er enn mjög vinsæll hjá stuðningsmönnum Atletico eftir að hafa raðað inn mörkum á Spáni.

Kólumbíumaðurinn vill þó gleyma leik kvöldsins sem fyrst en Monaco tapaði 2-0 og er á botni riðilsins með eitt stig.

Falcao fékk tækifæri til að minnka muninn í 2-1 á 83. mínútu leiksins er hann steig á vítapunktinn.

Stefan Savic fékk einnig rautt spjald hjá Atletico og er aldrei að vita hvað hefði gerst ef spyrna Falcao hefði farið í netið.

Falcao hitti hins vegar ekki markið af punktinum og upplifði algjörlega martröð í endurkomu sinni.