Arnór Sigurðsson lék allan leikinn fyrir CSKA Moskvu í kvöld sem mætti Viktoria Plzen í Meistaradeildinni.
Arnór og félagar gátu gulltryggt sæti sitt í Evrópudeildinni með sigri og hefðu einnig átt smá möguleika á að komast í 16-liða úrslit.
Ballið byrjaði vel fyrir heimamenn og skoraði Nikola Vlasic fyrsta mark leiksins úr vítaspyrnu eftir tíu mínútur.
Staðan var 1-0 í leikhléi en snemma í síðari hálfleik jöfnuðu gestirnir metin. Bæði lið þurftu að sækja til sigurs í kjölfarið en Plzen væri úr leik ef tap yrði niðurstaðan.
Það dró svo til tíðinda á 81. mínútu leiksins er Lukas Hejda skoraði óvænt annað mark Plzen og kom liðinu í 2-1.
Það dugði liðinu til sigurs og eru bæði lið nú með fjögur stig í þriðja og fjórða sæti riðilsins fyrir lokaumferðina. Roma og Real Madrid eru bæði komin í 16-liða úrslit.
Ajax er einnig komið í 16-liða úrslit eftir leik gegn grísku risunum í AEK Athens í kvöld. Leikurinn var í Grikklandi.
Ajax vann þægilegan 2-0 útisigur og er nú í efsta sæti riðilsins með 11 stig. Bayern Munchen á leik til góða gegn Benfica í kvöld og getur náð efsta sætinu á ný.
Benfica á enn smá möguleika á að komast í næstu umferð en liðið þarf að sigra Bayern á útivelli til að halda í vonina.
AEK 0-2 Ajax
0-1 Dusan Tadic(68′)
0-2 Dusan Tadic(72′)
CSKA 1-2 Plzen
1-0 Nikola Vlasic(10′)
1-1 Roman Prochazka(56′)
1-2 Lukad Hejda(81′)