Páll Höskuldsson skrifar frá Noregi
DV í Noregi spjallaði við Teit Þórðarson, knattspyrnuþjálfara vegna leiks Brann frá Bergen og Rosenborg frá Þrándheimi í norsku úrvalsdeildinni sem fer fram á sunnudag.
“Þettu voru stærstu leikirnir sem við spiluðum þegar við mættum Rosenborg á þessum árum”, sagði Teitur í samtali við DV í morgun.
,,Þegar ég þjálfaði Brann þá var Rosenborg með klárlega besta liðið í deildinni og þarna erum við að tala um mikla uppgangstíma hjá þeim.“
Teitur var tvisvar sinnum þjálfari hjá Brann, fyrst 1988-1991 og tók svo aftur við mörgum árum síðar eða 2000-2003.
,,Ég er nú eini þjálfarinn sem hef þjálfað tvisvar hjá Brann. Mönnum er yfirleitt ekki boðið að þjálfa aftur ef þeir hafa verið reknir.“
Teitur telur að Brann eigi góða möguleika á sigri ekki síst vegna þess að Rosenborg hefur ekki verið að spila vel undanfarið og hann telur að það hafi verið misráðið af félaginu að reka þjálfarateymið nú í sumar eða þá Kåre Ingebrigtsen og Erik Hoftun.
Í dag starfar Teitur sem aðþjálfari hjá Drøbak Frogn IL og hefur yfir umsjón með öllu knattspyrnustarfi hjá félaginu. DV þakkar Teiti fyrir spjallið og óskar honum velfarnaðar á komandi árum.