Gary Neville, fyrrum leikmaður Manchester United, var ekki hrifinn af byrjunarliði liðsins í dag gegn Chelsea.
Neville ræddi sérstaklega vörn United sem spilar við sterkt sóknarlið Chelsea en staðan er 1-0 fyrir þeim bláu í hálfleik.
Neville segir að vörn United geti ekki haldið hreinu með þessa menn á vellinum og hafði miklar áhyggjur fyrir byrjun leiks.
,,Þetta er ekki fjögurra manna varnarlína. Ashley Young, Chris Smalling, Victor Lindelof og Luke Shaw,“ sagði Neville.
,,Þetta veldur mér stórum áhyggjum. Ég myndi fara í leikinn hugsandi það að þeir þyrftu að skora tvö mörk því þeir munu fá eitt á sig.“
Það var Antonio Rudiger sem skoraði eina mark fyrri hálfleiks fyrir Chelsea með skalla eftir hornspyrnu.