Gianluigi Buffon, leikmaður Paris Saint-Germain, vill alls ekki mæta sínum fyrrum félögum í Juventus í úrslitum Meistaradeildarinnar.
Buffon lék í mörg ár með Juventus áður en hann samdi við PSG í sumar. Honum tókst aldrei að vinna Meistaradeildina með félaginu.
Hann elskar þó sitt fyrrum félag og vonar innilega að hann þurfi ekki að mæta því í deild þeirra bestu.
,,Nei ég vil alls ekki mæta þeim í úrslitaleiknum,“ sagði Buffon við Gazzetta dello Sport.
,,Ég vil ekki vera ánægður og á sama tíma fyrrum liðsfélagar mínir sorgmæddir og fyrrum stuðningsmenn.“
,,Við höfum nú þegar grátið of oft saman. Ég á skilið fullkomna gleði. Ef ég þarf að mæta Juventus þá er það vonandi fyrir úrslitin.“