Líkur eru á því að markvörðurinn Loris Karius verði bekkjaður í næsta leik Besiktas í Evrópudeildinni.
Tyrknenskir fjölmiðlar greina frá þessu en Karius samdi við Besiktas í sumar á láni frá Liverpool.
Þjóðverjinn hefur verið mikið gagnrýndur undanfarið og gerði slæm mistök í tapi gegn Malmö fyrr á tímabilinu.
Samkvæmt Fotomac í Tyrklandi verður Karius tekinn úr liðinu í leik gegn Genk í næstu viku.
Hann hefur þá einnig verið gagnrýndur í heimalandinu og fékk hressilega að heyra það frá fyrrum landsliðsmarkverðinum Uli Stein.
,,Það lítur út fyrir að Karius telji að það sé mikilvægara að taka myndir og setja á samskiptamiðla frekar en að standa sig á vellinum,“ sagði Stein.
,,Hann þarf að eiga tvö fullkomin tímabil til að sanna sig á ný.“
Karius notar Instagram mjög mikið og setur reglulega inn myndir. Hann er með 2,4 milljónir fylgjenda á miðlinum.