Harry Kane, leikmaður Tottenham, átti góðan leik með enska landsliðinu í gær í 3-2 sigri á Spánverjum.
Kane hefur verið aðal framherji Englands síðustu ár og ekki að ástæðulausu en hann raðar inn mörkum.
Kane hefur verið duglegur að skora fyrir bæði Tottenham og landsliðið og er oft orðaður við brottför.
Real Madrid er það félag sem hefur sýnt Kane mestan áhuga en hann virðist sjálfur ekki hafa áhuga á að fara þangað.
Spænska blaðið Marca reyndi að spyrja Kane út í möguleg skipti til Real í gær en fékk lítið til baka.
,,Afsakið, ekki í dag,“ sagði Kane og nennti hann ekki að svara þessari spurningu í enn eitt skiptið.
