Hólmar Örn Rúnarsson var svekktur líkt og aðrir leikmenn Íslands í kvöld eftir 2-1 tap gegn Sviss.

Ísland spilaði afar vel undir lok leiksins og pressaði stíft að marki gestanna en tókst ekki að jafna.

,,Mér fannst við setja góða pressu á þá undir lokin og úr því sem komið var þá hefði verið ljúft að taka eitthvað úr þessum leik,“ sagði Hólmar.

,,Mér fannst við byrja báða hálfleikana ekki nógu vel, við vorum langt á milli manna og það er eitthvað sem við þurfum að kíkja á.“

,,Þetta gerðist fljótt og þegar við erum komnir í svona stöðu er erfitt að fá eitthvað úr leiknum en við settum mikla pressu á þá og Alfreð skoraði frábært mark.“

,,Bæði mörkin komu eftir fyrirgjöf, ég á eftir að sjá þetta aftur en við þurfum að vera nær mönnunum.“