David Moyes, fyrrum stjóri Everton og Manchester United, býst við að Jose Mourinho muni fá meiri tíma á Old Trafford.
Mourinho hefur verið orðaður við sparkið undanfarnar vikur en gengi United hefur ekki verið nógu gott á leiktíðinni.
Moyes entist sjálfur ekki í eitt tímabil hjá United en hann segir að allir þurfi tíma til að sanna sig hjá félaginu.
,,Það stóra er að Jose náði í frábær úrslit um helgina,“ sagði Moyes í samtali við blaðamenn.
,,Það skiptir ekki máli hvernig þú vinnur en hann gerði það á góðan hátt, hvernig hann vann Newcastle.“
,,Ég held að þetta geti róað hlutina aðeins niður. Það tekur tíma fyrir alla að ná árangri hjá Manchester United.“
,,Jose hefur fengið tíma og ég er viss um að hann fái meiri tíma. Hann er sigurvegari og mun sanna það.“
