Rúrik Gíslason, leikmaður Sandhausen og íslenska landsliðsins hefur ákveðið að leita réttar síns vegna falskra Snapchat og Tinder reikninga í hans nafni.
Ljósmyndir frá leikmanninum voru teknar, án leyfis og notaðar við gerð þessara reikninga.
Rúrik færði sig um set í Þýskalandi á dögunum og samdi við Sandhausen en hann hefur spilað með Nürnberg þar í landi, undanfarin ár.
Yfirlýsingu frá Rúrik má sjá hér fyrir neðan.
Um helgina var athygli mín vakin á því að búið var að stofna falska Snapchat og Tinder reikninga í mínu nafni.
Við framkvæmd brotanna voru ljósmyndir af Instagram svæðinu mínu teknar ófrjálsri hendi og þannig látið líta út fyrir að ég væri notandi þessara reikninga.
Hér er um alvarleg brot að ræða á friðhelgi einkalífs míns og annarra. Vegna alvarleika brotanna fól ég lögmanni mínum þegar í stað að leggja fram kæru hjá lögreglu og hefur það verið gert.
Þýskalandi, 21. janúar 2018,
Rúrik Gíslason