Breiðablik á enn möguleika á að vinna Íslandsmeistaratitilinn í Pepsi-deild karla fyrir lokaumferðina um helgina.

Liðið þarf þó að treysta á hagstæð úrslit í leik Vals og Keflavíkur sem fer fram á Origo-vellinum.

Blikar eru tveimur stigum á eftir Val fyrir umferð helgarinnar og þarf að treysta á að Keflavík vinni sinn leik.

Það verður að teljast afar ólíklegt en Keflavík hefur náð í fjögur stig í allt sumar og er án sigurs.

Blikar mæta liði KA á sama tíma og þarf að vinna þann leik. Stjarnan er einnig inni í myndinni en liðið er þremur stigum á eftir Val og einu á eftir Blikum.

Blikar reyna allt til þess að hjálpa Keflavík að ná í góð úrslit um helgina og gerði stuðningsmannasveit liðsins, Kópacabana sér leið til Keflavíkur í dag.

Blikar afhentu Keflvíkingum kassa af Ripped orkudrykknum í samstarfi við Egil Einarsson og Fitness Sport.

Þeir vonast til að þessi orkudrykkur muni koma Keflvíkingum í stand fyrir leik helgarinnar, aldrei að vita!

Við viljum leggja okkar af mörkum fyrir laugardaginn. Kassi af Ripped, sponsored by @EgillGillz og Fitnesssport ?? #itscominghome pic.twitter.com/64KMGB9XcD

— Kópacabana (@KopacabanaKp) 27 September 2018