Mohamed Salah, leikmaður Liverpool, á skilið að vinna verðlaun FIFA sem afhent eru besta leikmanni ársins 2018.
Þetta segir Hany Ramzy, aðstoðarþjálfari Egyptalands en Salah kemur til greina ásamt Luka Modric og Cristiano Ronaldo.
Ramzy er á því máli að Salah eigi verðlaunin skilið en hann skoraði 44 mörk í öllum keppnum á síðustu leiktíð.
Salah kom mörgum á óvart með frammistöðu sinni en hann hafði áður átt misheppnaða dvöl á Englandi með Chelsea.
,,Ástæðan fyrir því að ég tel að Salah eigi að vinna verðlaunin er vegna hvernig hann hefur komist á þann stað sem hann er á í dag,“ sagði Ramzy.
,,Að koma aftur til Englands eftir misheppnaða dvöl hjá Chelsea og að verða markahæsti leikmaður deildarinnar, sem og að komast í úrslit Meistaradeildarinnar og fara með Egyptalandi á HM í fyrsta skiptið í 28 ár, það er eitthvað sem gerist aldrei.“