Jose Mourinho, stjóri Manchester United, talaði vel um sína leikmenn í kvöld eftir 2-1 sigur á Leicester City.

Mourinho nefndi Paul Pogba, Luke Shaw og Andreas Pereira sem áttu allir góðan leik í sigri United en Shaw skoraði sitt fyrsta mark fyrir félagið.

Mourinho sendi þá einnig kveðju á Richard Scudamore, formann ensku úrvalsdeildarinnar, og segir að hann hljóti að vera ánægður með fyrsta leik tímabilsins.

,,Ég er mjög ánægður fyrir hönd Luke Shaw. Hann gerði ein mistök á 90 mínútum, hann var mjög góður varnarlega og átti gott undirbúningstímabil,“ sagði Mourinho.

,,Herra Scudamore hlýtur að vera ánægður. Þetta er góð leið til að byrja mótið. Þetta vaar góður leikur, leikur þar sem ég hefði þurft að gera sex breytingar en ekki þrjár.“

,,Ég vil ekki kveðja án þess að nefna Andreas Pereira. Hann var á bekknum hjá Valencia og spilaði sem vængmaður.“

,,Hann kemur svo hingað á Old Trafford og spilar ótrúlegan leik. Paul Pogba var líka skrímsli í kvöld. Við héldum að hann gæti spilað 60 mínútur en hann spilaði 80.“