West Ham tók á móti Stoke í mánudagsleik ensku úrvaldeildarinnar í kvöld en leiknum lauk með 1-1 jafntefli.

Peter Crouch kom gestunum yfir með marki á 79. mínútu en Andy Carroll jafnaði metin fyrir heimamenn í uppbótartíma og lokatölur því 1-1.

Paul Lambert, stjóri Stoke var gríðarlega svekktur að fá ekki þrjú stig úr leiknum í kvöld.

„Þetta er hrikalega svekkjandi þar sem við vorum nokkrum sekúndum frá því að vinna leikinn. Mér fannst við spila mjög vel í kvöld og við fengum færin til þess að skora,“ sagði Lambert.

„Ég verð að hrósa þeim fyrir markið sem þeir skora. Þetta var ekki góð fyrirgjöf en þeir kláruðu þetta einstaklega vel. Heilt yfir er ég sáttur, við spiluðum vel og fengum góð færi.“

„Við erum tilbúnir að leggja allt í sölurnar fyrir félagið og stuðningsmennina og við verðum að vinna á sunnudaginn, svo einfalt er það,“ sagði stjórinn að lokum.