Það eru ekki allir sammála um það að myndbandstæknin VAR sé góð fyrir knattspyrnuíþróttina.

VAR gefur dómurum tækifæri á að skoða umdeild atvik í leikjum aftur og taka ákvörðun út frá myndböndum.

Marcos Alonso, leikmaður Chelsea, er ekki hrifinn af VAR eftir 1-0 tap gegn Tottenham í vikunni.

Eina mark leiksins skoraði Harry Kane fyrir Tottenham en það er deilt um hvort hann hafi verið rangstæður áður en hann fiskaði vítaspyrnu.

Línuvörður leiksins stoppaði og flaggaði rangstöðu en eftir að hafa skoðað myndband af atvikinu þá dæmdi dómari leiksins vítaspyrnu og enga rangstöðu.

,,Kannski vorum við óheppnir því þeir fengu eitt færi og það var línuverðinum að þakka, VAR að þakka,“ sagði Alonso.

,,Þegar ég horfi á myndbandið þá lítur hann út fyrir að vera rangstæður og línuvörðurinn lyfti flagginu svo við hættum allir.“

,,Dómarinn sagði við mig að það væri búið að útskýra málið en ég held að þeir hafi ekki útskýrt þetta fyrir línuverðinum því hann stoppaði og ef það er enhver vafi þá ætti hann ekki að gera það.“

,,Hann hætti að hlaupa. Ef við eigum svo að bíða eftir VAR þá verður hann að halda áfram að hlaupa. Hann hætti bara í miðju hlaupi svo þetta er ruglandi.“