Stuðningsmenn Barcelona á Spáni hafa látið í sér heyra varðandi hvaða leikmann félagið ætti að kaupa í sumar.
Það má búast við því að Barcelona styrki sig fyrir næstu leiktíð en það gæti þurft að yngja upp á leikmannahópinn.
Mundo Deportivo stóð fyrir könnun á dögunum þar sem stuðningsmenn voru beðnir um að velja þann leikmann sem félagið ætti að kaupa.
Það var einn mjög skýr sigurvegari en það var hinn ungi Kylian Mbappe sem spilar með Paris Saint-Germain.
Leikmenn á borð við Harry Kane, Robert Lewandowski, Antoine Griezmann og Neymar voru á meðal þeirra sem komu til greina.
Mbappe var þó langefstur í kosningunni en hann fékk 48 prósent atkvæða og var augljós sigurvegari.
Það verður að teljast ólíklegt að Mbappe kveðji PSG næsta sumar en hann er aðeins 20 ára gamall og á allan ferilinn eftir.