Lið Pro Piacenza komst í fréttirnar um helgina er liðið tapaði 20-0 gegn Cuneo í ítölsku C-deildinni.

Aðeins sjö leikmenn voru skráðir á leikskýrslu hjá Pro Piacenza en það voru unglingar á aldrinum 16 til 19 ára.

Nánast allir leikmenn liðsins hafa yfirgefið félagið sem hefur ekki borgað laun síðan í ágúst.

Liðið mætti ekki til leiks í nokkra leiki í röð fyrir leikinn gegn Cuneo og átti í hættu á að verða sparkað úr Serie C.

Því mætti liðið með sjö leikmenn til leiks og tapaði sannfærandi 20-0.

Ítalska knattspyrnusambandið hefur nú þrátt fyrir það hent liðinu úr deildinni og sektað það um 30 þúsund evrur.

Pro Piacenza mun því ekki leika fleiri leiki á þessu tímabili en staðan var slæm og var liðið langneðst á botni deildarinnar.