Það bjuggust margir við að Ryan Giggs myndi taka við Manchester United endanlega eftir dvöl Louis van Gaal hjá félaginu.
Van Gaal tók við United árið 2014 og var Giggs hans aðstoðarmaður. Hann ætlaði að þjálfa liðið til ársins 2017.
Giggs segir að Van Gaal hafi verið með sitt eigið plan en félagið gaf hins vegar engin loforð.
,,Þetta var meira Louis sem sagði þetta. Þið vitið hvernig hann er,“ sagði Giggs.
,,Hann sagði við Ed Woodward að hann yrði þjálfarinn næstu þrjú árin og að svo myndi ég taka við.“
,,Það var týpískur Louis. Enginn gaf nein loforð. Ég taldi mig ekki vera tilbúinn eftir að hafa hætt að spila en eftir að hafa unnið með Louis þá var ég meira en tilbúinn.“
,,Ég veit að þetta gekk ekki upp fyrir United en Louis var frábær fyrir mig því hann er kennari.“
