Danny Murphy, fyrrum leikmaður Liverpool, hefur nefnt þá leikmenn sem Manchester United gæti horft til í framtíðinni.
Murphy ræddi miðju United í pistli sínum í the Daily Mail og þá sérstaklega Ander Herrera og Nemanja Matic.
Þrátt fyrir að vera góðir leikmenn þá telur Murphy að þeir nái ekki alveg því besta úr Paul Pogba sem þarf mikið frelsi á miðjunni.
Hann nefnir svo leikmenn sem gætu reddað hlutunum á Old Trafford en það eru þeir Harry Winks hjá Tottenham og Declan Rice hjá West Ham.
,,Eins og staðan er þá nota þeir Matic og Herrera til að gefa Pogba frelsi í 4-3-3 kerfi en það býður ekki upp á eins mikið jafnvægi og til dæmis Marco Verratti og Marquinhos hjá PSG,“ sagði Murphy.
,,Það er ekki auðvelt að finna réttu leikmennina. Næsta kynslóð lítur vel út og ég mun fylgjast vel með Harry Winks og Declan Rice.“
,,Það eru leikmennirnir sem eru með tæknilegu gæðin. Winks er að fá mikla reynslu í stóru leikjunum. Er Rice framtíðarleikmaður United? Hann er líkamlega sterkur og er aðeins 20 ára gamall, sjáum til.“