Paul Merson, fyrrum leikmaður Arsenal, segir að liðið sé stútfullt af miðlungs leikmönnum og hefur áhyggjur af stöðu félagsins.

Merson er alls ekki hrifinn af því sem Arsenal hefur gert á leikmannamarkaðnum síðustu ár en liðið hefur ekki unnið deildina frá árinu 2004.

,,Þetta er miðlungs lið með miðlungs leikmenn. Ef þeir væru allir til sölu á morgun, hversu mörg topplið myndu taka þá?“ sagði Merson.

,,Þá meina ég fyrir ágætis upphæð, ekki á frjálsri sölu. Ef þau borguðu það sama og Arsenal borgaði, það er áhyggjuefni.“

,,Þegar Arsenal spilaði á Highbury fyrir framan 38 þúsund manns var liðið með heimsklassa leikmenn út um allt.“

,,Nú eru þeir með 60 þúsund manna völl og það er búið að borga fyrir hann, þetta er eitt ríkasta félag heims. Hversu marga heimsklassa lekmenn eru þeir með?“

Ef Arsenal spilaði við Tottenham í bikarúrslitum á morgun, hver kemst í hvaða lið? Það er erfitt að finna leikmann Arsenal sem kæmist í lið Tottenham.“