Angel Di Maria, leikmaður Paris Saint-Germain, naut þess að vinna Manchester United í Meistaradeildinni í gær.

Di Maria og félagar unnu góðan 2-0 útisigur á United en um var að ræða leik í 16-liða úrslitum keppninnar.

Leikið var á Old Trafford í Manchester en Di Maria lék einmitt þar frá 2014 til 2015 áður en hann kvaddi.

Hann hefur ekki talað vel um tíma sinn hjá félaginu og hefur gagnrýnt hvernig komið var fram við sig opinberlega.

Baulað var á vængmanninn í leik gærdagsins og eftir fyrra mark PSG þá ákvað hann að nýta sér tækifærið.

,,Farið til fjandans,“ öskraði Di Maria á stuðningsmenn United sem fór ekki vel í marga.

Talað var um að Argentínumaðurinn væri á leið í bann en útlit er nú fyrir að ekkert verði úr því.

Samkvæmt nýjustu fregnum erlendis þá sleppur Di Maria við ákæru og verður klár í seinni leik liðanna.