Fréttablaðið greindi frá því á dögunum að Hannes Þór Halldórsson, markvörður Qarabag í Aserbaídjsan hefði náð samkomulagi við Val. Hannes hefur verið besti markvörður Íslands á síðustu árum.

Sagt var að allar líkur væru á því að Hannes myndi ganga í raðir Vals og gæti það enn gerst. Sigurbjörn Hreiðarsson, aðstoðarþjálfari Vals gefur samt lítið fyrir þessar fréttir í samtali við Fótbolta.net.

,,Samkvæmt heimildum Fréttablaðsins hefur Hannes Þór Halldórsson, landsliðsmarkvörður samþykkt tilboð Vals og kaus hann að semja við ríkjandi Íslandsmeistara frekar en KR. Samkvæmt sömu heimildum eru Valsmenn tilbúnir að bjóða Hannesi talsvert betri kjör en KR gat boðið,“ sagði í fréttinni.

,,Ég veit ekki hvaða heimildarmenn það eru,“ sagði Sigurbjörn við Fótbolta.net um að hvort frétt Fréttablaðsins væri ekki rétt.

,,Ég held að það sé bara bullshit, og ég veit það. Það er ekki málið, hann er bara í Aserbaídsjan.“

Hannes varð Íslandsmeistari með KR áður en hann fór í atvinnumennsku. Hannes hefur verið einn mikilvægasti leikmaður íslenska landsliðsins síðustu ár, hann varði mark liðsins á EM og á HM.

Valur hefur unnið Pepsi deildina síðustu tvö tímabil og hefur styrkt leikmannahóp sinn vel í vetur. Ljóst er að koma Hannesar yrði hvalreki.

Fyrir er Valur með Anton Ara Einarsson sem var einn besti markvörður deildarinnar sumarið 2017.