Fyrr í dag var Knattspyrnufélag ÍA að ganga frá samningi við Tryggva Hrafn Haraldsson. Tryggvi Hrafn gengur til liðs við ÍA frá Halmstad í Svíþjóð en hann er fæddur 1996 og hefur leikið 27 leiki með sænska liðinu og skorað þrjú mörk.
Skagamenn þekkja vel til Tryggva Hrafns en hann spilaði með yngri flokkum ÍA og lék 33 leiki með liðinu og skoraði sex mörk í efstu deild karla á sínum tíma.
Hann hefur leikið þrjá leiki og skorað eitt mark með A landsliði Íslands og 13 leiki og eitt mark með U-21.
Jóhannes Karl Guðjónsson þjálfari meistaraflokks karla segist vera mjög ánægður með að Tryggvi Hrafn hafi gengið til liðs við ÍA á nýjan leik. Þrátt fyrir ungan aldur hafi hann spilað í efstu deild áður og slík reynsla muni reynast mikilvæg í sumar. Hann sé góður leikmaður sem muni styrkja liðið fyrir komandi baráttu.