Erlendir fjölmiðlar halda því fram að Real Madrid reyni sitt besta að eyða sögu Cristiano Ronaldo hjá félaginu, ef svo má að orði komast.

Ronaldo yfirgaf félagið síðasta sumar eftir níu ára dvöl hjá félaginu, Ronaldo taldi Real Madrid ekki meta sig og þau afrek sem hann hafði unnið fyrir félagið. Ronaldo er markahæsti leikmaðurinn í sögu félagsins.

Ronaldo vildi því fara en hann vann Meistaradeildina, þrisvar í röð með félaginu og var besti leikmaður liðsins öll árin.

Ronaldo átti ekki í góðu sambandi við Florentino Perez, forseta félagsins. Forsetinn taldi að Gareth Bale yrði stjarnan ef Ronaldo færi og Zinedine Zidane sagði upp störfum vegna þess. Real Madrid hefur hrunið eftir að Ronaldo fór.

Félagið hefur eftir mesta megni reynt að forðast það að fjalla um Ronaldo eftir að hann fór, félagið hætti að fylgja honum á samfélagsmiðlum um leið og hann fór. Það vakti athygli.

Þegar fjallað er um gamlar hetjur félagsins á vefnum þá er talað um Alfredo Di Stefano og Zinedine Zidane í stað þess að minnast afreka Ronaldo. Þá hefur félagið reynt að forðast það að fjalla um hann á sjónvarpsstöð sinni þegar farið er yfir gamla tíma.

Á vef félagsins er einnig reynt að forðast að birta myndir af Ronaldo þegar afrek síðustu ára eru rifjuð upp.