Newcastle United keypti leikmann fyrir metfé í janúar er liðið samdi við Miguel Almiron.
Almiron kom til Newcastle frá Atlanta United í bandarísku MLS-deildinni og kostaði hann félagið 21 milljón punda.
Nú er talað um að Newcastle sé að bæta það met og ætli að fá framherjann Joelinton sem spilar með Hoffenheim.
Joelinton er 22 ára gamall og samkvæmt Sport1 í Þýskalandi mun Newcastle borga 52 milljónir punda fyrir leikmanninn.
Það væri risastórt skref fyrir félagið sem hefur eytt litlu í leikmenn undanfarin ár.
Joelinton þykir ansi spennandi leikmaður en hann hefur gert tíu deildarmörk í 28 leikjum á tímabilinu.
Samkvæmt Sport gæti samkomulag náðst í næstu viku en hann myndi svo ganga í raðir félagsins í sumar.