Tilkynning Breiðabliks:
Miðjumaðurinn óþreytandi Andri Rafn Yeoman hefur skrifað undir nýjan þriggja ára samning við knattspyrnudeild Breiðabliks. Þetta eru frábærar fréttir fyrir Blika því þrátt fyrir að vera ekki nema 27 ára gamall er Andri Rafn leikjahæsti leikmaður Breiðabliks í efstu deild frá upphafi.
Andri Rafn hefur leikið 302 leiki fyrir meistaraflokk Breiðabliks og skorað í þeim 16 mörk. Andri Rafn varð bikarmeistari með Blikum árið 2009 og Íslandsmeistari árið 2010. Þessi hógværi leikmaður hefur verið einn af bestu miðjumönnum deildarinnar undanfarin áratug.
Andri Rafn meiddist í bikarúrslitaleiknum gegn Stjörnunni í haust á Laugardalsvelli en hann var fram að því einn besti maður vallarins. Andri er nú kominn á gott skrið aftur og styttist í að stuðningsmenn Blika fái að sjá þennan frábæra leikmann aftur á vellinum.