Stuðningsmenn Manchester United eru óánægðir með fyrrum markvörðinn Peter Schmeichel eftir ummæli sem hann lét falla.
Schmeichel er goðsögn hjá United en hann er af mörgum talinn besti markvörður í sögu félagsins.
Hann ræddi stefnu United og þá ákvörðun að reka David Moyes árið 2014 en hann fékk aðeins nokkra mánuði hjá félaginu.
Moyes tók við af Sir Alex Ferguson árið 2013 en var fljótt látinn fara eftir slæmt gengi.
,,Ef það er eitt sem við ættum að sjá á eftir hjá Manchester United er að við gáfum David Moyes bara sjö mánuði,“ sagði Schmeichel.
,,Við hefðum átt að gefa honum meiri tíma, sætt okkur við að úrslitin yrðu ekki þau sem við vildum og spilamennskan ekki heldur.“
,,Ég trúi því að hann hefði komist inn í starfið. Hann er með persónuleikan og leikskilninginn.“
,,Hann þurfti að læra svo mikið en fékk ekki að læra frá neinum. Hann þurfti að sjá um þetta sjálfur.“