Manchester United vann sannfærandi sigur í ensku úrvalsdeildinni í gær er liðið mætti Fulham. Heimamenn í Fulham lentu undir með tveimur mörkum í fyrri hálfleik en þeir Paul Pogba og Anthony Martial skoruðu mörkin.
Pogba var svo aftur á ferðinni fyrir United á 65. mínútu leiksins er hann skoraði úr vítaspyrnu. Öruggur 3-0 sigur United staðreynd og er liðið komið í 4. sæti deildarinnar á undan Chelsea.
Það vakti athygli að Avram Glazer eigandi félagsins var mættur á völlinn ásamt Ed Woodward stjórnarformanni félagsins.
Glazer mætir ekki á mikið af leikjum en ástæða fyrir komu hans hefur nú verið opinberuð. Glazer var mættur til að funda með Jim Solbakken, umboðsmanni Ole Gunnar Solskjær.
Solskjær stýrir United tímabundið en eftir tíu sigra í ellefu leikjum er líklegt að hann fái starfið.
Glazer, Woodward og Solbakken funduðu eftir sigurinn þar sem framtíð Solskjær hefur verið rædd.