Valur er ekki að fá Anthony Annan miðjumann frá Ghana til félagsins eins og erlendir fjölmiðlar höfðu sagt frá.
„Ef ég segi eins og er þá veit ég ekkert hver þessi leikmaður er. Hróður Vals fer víða en það er ekkert til í þessum fréttum. Við erum ekki að fá þennan leikmann,“ sagði Börkur Edvardsson formaður knattspyrnudeildar Vals í samtali við mbl.is.
Annan er án félags en hann varð finnskur meistari með HJK á síðustu leiktíð.
Sagt er að fjöldi liða á Norðurlöndum vilji fá Annan en þar eru nefnd lið í Finnland og Svíþjóð.
Valur hefur verið að styrkja lið sitt hressilega í vetur en ljóst er að koma Annan myndi styrkja liðið, hann er 32 ára gamall.
Annan hefur spilað fyrir stór félög eins og Rosenborg, Schalke og Vitesse í Hollandi.
Hann hefur spilað 67 landsleiki fyrir Ghana en hann spilaði meðal annars á HM í Suður-Afríku árið 2010.
