Sverrir Ingi Ingason, leikmaður Rostov í Rússlandi, gæti verið að færa sig yfir í nýtt félag. Sverrir hefur undanfarið eitt og hálft ár leikið með Rostov en hann komi til  félagsins frá Granada árið 2017.

Samkvæmt fjölmiðlum í Grikklandi þá er PAOK að reyna að kaupa íslenska landsliðsmanninn. Hjörvar Hafliðason, knattspyrnusérfræðingur segir að Sverrir ætti að skrifa undir í vikunni.

Magnús Agnar Magnússon, umboðsmaður kappans sagði í samtali við 433.is að einhverjar viðræður hefðu átt sér stað en vildi lítið annað segja.

PAOK er besta lið Grikklands í dag en liðið er á toppi deildarinnar með átta stiga forskot.

Liðið lék í Evrópudeildinni á þessu tímabili og spilaði á meðal annars gegn stórliði Chelsea.

Sverrir er 25 ára gamall hafsent en hann á að baki 26 landsleiki fyrir Ísland og hefur gert þrjú mörk.

Hjá Rostov er Sverrir með þremur Íslendingum en Viðar Örn Kjartansson, Ragnar Sigurðsson og Björn Bergman Sigurðarson eru hjá félaginu.

Sverrir Ingi Ingason færist nær toppliði grísku deildarinnar, PAOK. Díllinn ætti að klárast í vikunni samkvæmt mínum mönnum í Grikklandi. pic.twitter.com/rDKLF586mU

— Hjörvar Hafliðason (@hjorvarhaflida) January 22, 2019