Vahid Halilhodzic, þjálfari Nantes í Frakklandi, er óánægður með varnarmanninn Matt Miazga sem er í láni hjá félaginu.
Miazga kom til Nantes í sumar frá Chelsea en hann skrifaði undir lánssamning við franska félagið.
Miazga hefur ekki spilað leik síðan í október og vill komast burt frá félaginu. Hann laug um það að vera meiddur svo Halilhodzic gat ekki notað hann.
Það eru mikil vandræði hjá Nantes þessa dagana en Kolbeinn Sigþórsson er á mála hjá félaginu en fær ekkert að spila.
,,Þessi kúgun sem ég var að tala um í gær var varðandi Matt Miazga,“ sagði Halilhodzic.
,,Hann sannfærði mig um að hann væri með verk í bakinu. Eftir að hafa farið í skoðun þá kom í ljós að það var ekkert vandamál þarna.“
,,Hann vill bara fá að yfirgefa félagið. Í morgun var Miazga svo mættur til London, til Chelsea. Hann sagði engum frá.“
,,Þetta pirrar mig mikið en við þurfum að koma þessu í gegn, jafnvel þó ég sé vonsvikinn með það.“