Manchester United á Englandi hefur keypt ófáa leikmenn undanfarin ár fyrir háar upphæðir.
Nefna má þá Paul Pogba og Romelu Lukaku en þeir kostuðu félagið yfir 80 milljónir punda.
Enskir miðlar greina frá því í kvöld að United skuldi ennþá félögum um 100 milljónir punda fyrir leikmannakaup.
Eins og önnur félög þá staðgreiðir United ekki sína leikmenn heldur er upphæðinni dreift á nokkra mánuði.
United samþykkti að borga 89 milljónir punda fyrir Pogba og er enn að borga þá upphæð til Juventus.
Félagið hefur keypt leikmenn fyrir 560 milljónir punda á fjórum árum og selt leikmenn á móti fyrir 196 milljónir.