Marcelo Bielsa, stjóri Leeds á Englandi, hélt óvæntan blaðamannafund í dag.
Bielsa komst í fréttirnar á dögunum eftir að hann viðurkenndi að hafa sent njósnara á æfingasvæði Derby.
Njósnarinn fylgdist með æfingu Derby degi fyrir leik liðanna í ensku Championship-deildinni.
Það er ekkert sem bannar það að lið njósni um andstæðinga sína en þykir óíþróttamannslegt á Englandi.
Bielsa er að þjálfa í fyrsta sinn á Englandi en hann var vanur að gera sömu hluti annars staðar í Evrópu og í Suður-Ameríku.
Talað var um að hann væri að segja af sér á blaðamannafundi dagsins en það reyndist ekki rétt.
Bielsa vildi þó aðeins halda þennan fund til að ræða njósnamálið sérstaklega. Hann vildi ekki að það yrði aðal umræðuefnið á blaðamannafundi morgundagsins fyrir næsta leik Leeds.
Hann staðfesti það að hann hefði njósnað um öll lið deildarinnar til þessa en Leeds er í efsta sæti deildarinnar og hefur gengið verið frábært.
Bielsa sagði þá enn fremur að það sem hann hefði gært væri ekki ólöglegt en viðurkenndi að allt sem væri ekki ólöglegt væri þó ekki rétt að gera.