Baldur Sigurðsson, miðjumaður Stjörnunnar og íþróttamaður ársins 2018 í Garðabæ fór í aðgerð á hné í vikunni. Þetta staðfesti hann í samtali við 433.is í dag.
Baldur fann fyrir verki í hnénu og ákveðið var að skera hann upp. Það var sjálfur Dr. Football, Hjörvar Hafliðason sem sagði fyrst frá meiðslum Baldurs í þætti sínum.
,,Ég þurfti að fara í smá aðgerð á hné, ég var skorinn upp fyrir tveimur dögum. Þetta er svipuð aðgerð og ég hef farið í vinsta megin. Aðgerðin gekk vel og nú er bara stefnan sett á að vera klár í fyrsta leik,“ sagði Baldur og á þar við um Pepsi deildina sem hefst í lok apríl.
Ljóst er að það gæti staðið tæpt en Baldur ætlar að gera allt til þess að það takist. ,,Þetta eru þrír mánuðir sirka, plús, mínus. Ég var búinn að finna fyrir þessum verk fyrir jól, ég hélt að það myndi svo bara fara.“
,,Ég hafði verið að æfa á fullum krafti en verkurinn fór ekkert þegar ég fór af stað, það var svo bara í samráði við lækni sem við ákváðum að þetta væri best.“
,,Þetta er ekki nein dramatík, bara smá viðgerð á gömlum karli,“ sagði Baldur léttur en hann verður 34 ára gamall á þessu ári.
