Ólafur Jóhannesson, þjálfari Vals, fagnar því að hafa fengið þrjá nýja leikmenn til félagsins í dag.
Valur samdi við þá Gary Martin, Emil Lyng og Lasse Petry og koma þeir allir til með að styrkja hóp Vals verulega.
Ólafur ræddi þessa leikmenn í samtali við 433.is og er spenntur fyrir komu þeirra.
,,Gary er frábær fótboltamaður og við höfum oft reynt að fá hann svo ég er mjög sáttur. Hann var sá fyrsti sem kom upp í hausinn þegar Patrick Pedersen fór,“ sagði Óli.
,,Emil er frábær fótboltamaður eins og allir sem við fáum til liðsins. Hann er hörkuleikmaður til að standa sig vel í þessari deild og við viljum vera með stóran leikmannahóp.“
,,Hann getur spilað sem fremsti maður og allar stöður á miðjunni. Við þurfum að púsla þessu saman.“
,,Lasse Petry er mjög flinkur í fótbolta. Flestir þessir útlendingar, við vitum ekki alltaf allt um þá en við erum með gott tengslanet í Danmörku og höfum fengið mikið af dönskum leikmönnum. Okkur er sagt að hann muni henta okkur einstaklega vel.“
,,Ef það kemur eitthvað nýtt upp þá skoðum við það. Það er aldrei slæmt að missa leikmenn til útlanda, það er bara góð viðurkenning fyrir klúbbinn og við fögnum því.“