Elísabet Gunnarsdóttir verður ekki næsti þjálfari kvennalandsliðsins, þetta kemur fram á RÚV í dag.
Elísabet hafði rætt við KSÍ en sambandið leitar að næsta landsliðsþjálfara fyrir stelpurnar. Freyr Alexanderssn hefur látið af störfum og gerðist aðstoðarlandsliðsþjálfari karla.
Ástæða þess að Elísabet tekur ekki við liðinu er sú að hún býr í Svíþjóð, sagt er á RÚV að krafa KSÍ sé að kvennalandsliðsþjálfarinn búi á Íslandi.
Þetta eiga margir erfitt með að skilja enda bjó Lars Lagerback alla sína tíð í Svíþjóð þegar hann þjálfaði strákana. Þá býr Erik Hamren einnig í Svíþjóð en hann er með karlalandsliðið í dag.
„Síðan voru að sjálfsögðu önnur atriði sem ég þurfti að vega og meta en niðurstaðan var að gefa þennan möguleika frá mér. Það er að sjálfsögðu draumastarf fyrir íslenskan þjálfara að taka við landsliðsþjálfara starfinu. Vonandi kemur tækifærið aftur seinna og vonandi fær KSÍ til starfa metnaðarfullan þjálfara sem kemur liðinu á góðan stað,“ segir Elísabet í samtali við RÚV í dag.
Fanne Birna Jónsdóttir, blaðamaður á, Kjarnanum gagnrýnir þessar reglur KSÍ.
,,Wtf! Þetta bara getur ekki verið. Lassi bjó alla sína þjálfaratíð svona korteri frá Elísabetu. Og ekki hef ég heyrt af því að Hamrén sé fluttur í Hlíðarnar… þetta hlýtur að vera glens. Augljósasti og besti kosturinn í starfið!,“ skrifar Fanney á Twitter.
Stór hluti kvennalandsliðsins spilar hér á landi og því vill KSÍ hafa þjálfarann hér, í karlalandsliðinu er aðeins einn leikmaður sem spilar á Íslandi.