Gunnar Heiðar Þorvaldsson, framherji ÍBV mun á næsta laugardag leika sinn síðasta leik á ferlinum.

Gunnar hefur átt afar farsælan feril en hann lék í elllefu ár í atvinnumennsku en hann lék á Norðurlöndum, í Þýskalandi og á Englandi.

,,Ég get alveg viðurkennt það að ég er mjög stoltur af ferlinum mínum! Að sjómanns sonur frá lítilli eyju einhvers staðar lengst út í rassgati hafi náð að afreka það sem ég hef gert á ferlinum er í raun alveg fáránlegt,“ skrifar Gunnar í pistli á Facebook síðu sinni.

Gunnar lék 24 landsleiki en hann kom heim til Eyja árið 2015 og náði að vinna bikarinn með liðinu í fyrra.

,,Það hefur kostað mikla vinnu, aga og fórnir. Einnig hefur stuðningur frá fjölskyldunni gert mér það kleift að hafa náð mínum markmiðum og langar mig sérstaklega að þakka konunni minni“

Pistill Gunnars:
Næsta laugardag mun ég spila minn síðasta leik á knattspyrnuferlinum. Það er frábær tilfinning að gera það með íBV, þar sem allt byrjaði. Ég get alveg viðurkennt það að ég er mjög stoltur af ferlinum mínum! Að sjómanns sonur frá lítilli eyju einhvers staðar lengst út í rassgati hafi náð að afreka það sem ég hef gert á ferlinum er í raun alveg fáránlegt:) En það hefur kostað mikla vinnu, aga og fórnir. Einnig hefur stuðningur frá fjölskyldunni gert mér það kleift að hafa náð mínum markmiðum og langar mig sérstaklega að þakka konunni minni, Bjarný fyrir að hafa stutt mig í blíðu og stríðu! Fyrir það verð ég ævinlega þakklátur.

Að lokum vil ég þakka öllum stjórnarmönnum, þjálfurum, leikmönnum og stuðningsmönnum sem ég hef unnið með á ferlinum fyrir tímann og minningar að eilífu.

Takk fyrir mig!