Maurizio Sarri, stjóri Chelsea, viðurkennir það að sitt lið sé ekki eins gott og topplið Liverpool þessa stundina.

Chelsea tapaði sínum fyrstu stigum í deildinni í dag er liðið gerði markalaust jafntefli við West Ham.

Verkefnið verður ekki auðveldara fyrir Chelsea á næstunni sem spilar við Liverpool í bæði deildarbikarnum og úrvalsdeildinni.

,,Við þurfum að spila gegn mjög, mjög góðu liði sem hefur haft sama stjórann í nokkur ár,“ sagði Sarri.

,,Þeir eru skrefi á undan okkur þessa stundina. Við byrjuðum að vinna saman fyrir 40 dögum síðan og fengum minni tíma útaf landsleikjahléinu.“

,,Þetta er ansi snemmt fyrir okkur. Við verðum að vinna og bæta okkur og kannski eftir eitt ár verðum við jafn góðir og Liverpool.“