Matteo Guendouzi, leikmaður Arsenal á Englandi, hefur óvænt komið mikið við sögu á tímabilinu.
Guendouzi er aðeins 19 ára gamall og þykir efnilegur en hann kom til félagsins frá Lorient í sumar.
Margir bjuggust við því að Guendouzi yrði í aukahlutverki en hann hefur komið mjög sterkur inn.
Frakkinn hefur nú greint frá því að hann hafi fylgst vel með Arsenal á sínum yngri árum.
Guendouzi var mikill aðdáandi Patrick Vieira og Thierry Henry en þeir voru magnaðir á Englandi á sínum tíma.
,,Paris Saint-Germain var það félag sem átti stað í mínu hjarta því ég spilaði þar frá sex til 15 ára aldurs,“ sagði Guendouzi.
,,Þegar ég varð eldri þá fylgdist ég með öðrum liðum og ég varð ástfanginn af Arsenal. Ég sá mörg myndbönd.“
,,Leikmenn eins og Thierry Henry og Patrick Vieira létu mig elska félagið og mig dreymdi um að fara þangað.“
,,Þegar ég sé styttuna af Henry fyrir utan Emirates þá minnir það mig á þessi myndbönd.“