Það gengur illa hjá liði Tottenham að kom nýjum velli félagsins í stand en félagið vonaðist til að byrja að nota hann í byrjun tímabils.

Völlurinn er enn ekki nothæfur og er búist við að hann verði ekki klár fyrr en á næsta ári.

Það hefur kostað Tottenham um 850 milljónir punda að byggja völlinn en nú er starfsfólkið sem sér um að byggja völlinn í umræðunni.

Greint er frá því í dag að starfsfólk hafi verið að drekka áfengi á svæðinu og jafnvel taka eiturlyf á klósettum vallarins.

Næstum 4000 manns hafa komið að verkefninu og hefur mikið farið úrskeiðis. Það hefur einnig vantað mikilvæg efni til að klára byggingu vallarins.

Samkvæmt grein Construction News hafa einnig slagsmál átt sér stað hjá starfsfólki vallarins og eru einhverjir sem hafa sagt upp störfum.

,,Ég hef ekki unnið svona verkefni í langan, langan tíma. Það var fólk sem var orðið hauslaust drekkandi áfengi strax er það mætti til vinnu og aðrir sem notuðu kókaín á baðherberginu,“ er haft eftir einum starfsmanni.

Það verður fróðlegt að sjá hvernig Tottenham tekur á þessum málum en liðið hefur til þessa verið að spila heimaleiki sína á Wembley.