Sverrir Ingi Ingason, leikmaður íslenska landsliðsins, ræddi við blaðamenn eftir 3-0 tap gegn Belgíu í kvöld.

Sverrir var mun ánægðari með spilamennsku liðsins í kvöld en í 6-0 tapi gegn Sviss á laugardag.

,,Við spiluðum töluvert betur í dag en á laugardaginn, þetta var ekki ásættanlegt á laugardaginn,” sagði Sverrir.

,,Við vorum staðráðnir í því að koma til baka og sýna það að við gætum varist sem lið og að það væri smá andi í þessu og attitude.”

,,Við byrjuðum leikinn mjög vel en svo ná þeir inn tveimur mörkum á stuttum tíma og það drap. Við hengdum ekki haus eins og á laugardag og duttum í eitthvað sem við eigum ekki að gera.”

,,Belgía er lið í heimsklassa, þeir eru með leikmenn sem eru í bestu félagsliðum í heimi og eru eru ásamt Frökkum eitt besta landslið heims í dag.”

Sverrir fékk dæmda á sig vítaspyrnu í fyrri hálfleik en hann braut þá á framherjanum Romelu Lukaku.

,,Það er erfitt að eiga við Lukaku í stóru svæði einn á einn. Hann er nautsterkur og kemst fram fyrir mig og ég reyni að trufla hann. Víti eða ekki, ég veit það ekki.“