Emil Hallfreðsson miðjumaður íslenska landsliðsins á að vera leikfær er liðið mætir Belgíu á morgun í Þjóðadeildinni.
Emil gat ekki spilað í 6-0 tapi gegn Sviss á útivelli á laugardaginn. Hann hefur verið að glíma við meiðsli en mun æfa í dag og ætti því að geta spilað.
Erik Hamren þjálfari Íslands væri stressaður ef leikmenn Ísland hefðu brosað eftir tapið gegn Sviss.
,,Andrúmsloftið hefur verið lágt, það á að vera þannig. Ég væri stressaður ef menn væru glaðir og brosandi, þá væri ég stressaður. Ég hef rætt við leikmennina sem byrjuðu í sitthvoru lagi, ég hef talað við hópinn. Ég get borið þetta tap saman við leik Brasilíu og Þýskalands á HM þar sem Brasilía tapaði 7-1, þeir fengu áfall. Eftir 3-0 gegn SViss þá vorum við í áfalli, við unnum ekki saman og þá eru öll lið í vandræðum,“ sagði Hamren.
Hamren hefur boðað breytingar á byrjunarliði Íslands og ekki ólíklegt að 4-5-1 kerfið verði fyrir valinu.
,,Það verða breytingar, leikmenn sem spiluðu síðasta leik detta út. Það er ekki þeim að kenna samt hvernig fór, ekki af því að þeir voru slakir. Meira taktísk, margir leikmenn eru svipaðir en með mismunandi hæfileika.“