Framherjinn Darren Bent er án félags þessa stundina en hann yfirgaf Derby County eftir síðustu leiktíð.
Bent er leikmaður sem flestir kannast við en hann lék lengi með liðum á borð við Tottenham, Sunderland og Aston Villa í ensku úrvalsdeildinni.
Bent er fyrrum enskur landsliðsmaður en hann lék 13 leiki fyrir landsliðið á sínum tíma og skoraði fjögur mörk.
Bent var í láni hjá Burton Albion á síðustu leiktíð og vill félagið nú fá hann til að skrifa undir samning út leiktíðina.
Bent skoraði tvö mörk í 15 leikjum fyrir Burton í ensku Championship-deildinni en liðið féll á leiktíðinn og spilar nú í þriðju efstu deild.
Nigel Clough, stjóri Burton, hefur staðfest það að félagið vilji semja við leikmanninn tímabundið.
,,Hann gæti sinnt einhverjum verkefnum í fjölmiðlum. Hann má bara koma og fara þegar hann vill,“ sagði Clough.
Bent myndi því mæta á æfingar og í leiki þegar það hentar honum en Burton þarf enn nokkra leikmenn til að fylla upp í leikmannahópinn fyrir tímabilið.