Stjarnan er á leið í úrslitaleik Mjólkurbikars karla en liðið mætti FH í undanúrslitum í Garðabæ í kvöld.
Tvö mörk voru skoruð en það gerðu þeir Guðjón Baldvinsson og Guðmundur Steinn Hafsteinsson fyrir heimamenn.
Hér má sjá það góða og slæma úr leiknum.
Plús:
Faglega klárað hjá Stjörnumönnum. Þeir skora oft mikið af mörkum en í kvöld gerðu þeir nákvæmlega það sem þurfti til sigurs.
Það var alveg ótrúlega gaman að sjá Eddi Gomes og Guðjón Baldvinsson berjast í kvöld. Það eru ekki margir sem eiga eitthvað í Guðjón í styrk en..
Varnarleikur Stjörnunnar fær hrós, voru agaðir aftast og vörðu forystuna afar vel þegar líða tók á leikinn.
Það er frábært fyrir Stjörnuna að komast í úrslit bikarsins. Ætla sér tvennuna og hún er í boði!
Þetta er fyrsti úrslitaleikur Stjörnunnar í bikarnum í fimm ár. Því bera að fagna fyrir þá bláklæddu.
Mínus:
Evrópudraumur FH-inga er alls ekki úti en liðið er þó í fimmta sæti og heilum átta stigum frá Stjörnunni sem situr í þriðja sæti í Pepsi-deildinni. Liðið gæti þurft að ná fjórða sætinu og treysta á að Stjarnan eða Blikar vinni bikarinn.
Það var mikil pressa á FH fyrir leiktíðina og bikarinn hefði getað ‘bjargað’ sumarinu fyrir Óla Kristjáns og félaga en þeir eru nú úr leik. Eitt versta sumar liðsins í mörg, mörg ár.
Eddi Gomes fékk mikið lof er hann byrjaði feril sinn í Kaplakrika. Skipulagið var þó mjög tæpt í öftustu línu Hafnfirðinga í dag og virkuðu menn viltir, alveg eins með Pétur og Rennico Clarke.
Sóknarleikur FH-inga var líka ansi bitlaus. Áttu tvö sláarskot á tveimur sekúndum í fyrri hálfleik en lengra komust þeir ekki.
Er kominn tími á breytingar? Er það svo víst að Óli Kristjáns sé rétti maðurinn fyrir FH eða þarf hann annað tímabil?
Það er vandamál þegar það er ekki hægt að hrósa FH-ingum fyrir neitt í kvöld. Það kemur eiginlega bara ekkert til greina.