Ólafur Kristjánsson, þjálfari FH, var óánægður með dómgæsluna í kvöld er liðið tapaði 2-0 gegn Stjörnunni í undanúrslitum bikarsins.
Óli ræddi sérstaklega um atvik sem kom upp í fyrri hálfleik er Jakup Thomsen var að sleppa í gegn en rangstaða var dæmd.
Miðað við endursýningar var dómurinn rangur og segir Óli að svona hlutir hafi gerst allt of oft í sumar.
,,Ég var að spyrja hann út í atvikið í fyrri hálfleik þar sem Jakup er að sleppa í gegn og af hverju það sé flaggað,“ sagði Óli við Stöð 2 Sport en hann ræddi við Pétur dómara eftir leikinn.
,,Hann dæmir rangstöðu en Brynjar Gauti reynir við boltann og þá er komin ný staða og það er ekki rangstaða.“
,,Aðstoðardómarinn setur upp flaggið og Pétur tekur á móti því. Þetta er orðið óþolandi að lenda í þessu aftur og aftur.“
,,Við erum að elta leikinn og erum lið sem er í vandræðum og við eigum ekki enfi á svona. Ég spurði hann bara rólega af hverju hann dæmir rangstöðu.“
,,Samkvæmt bókinni er þetta ekki rangstaða og pirringurinn hjá mér er auðvitað líka því við vinnum ekki leikinn.“