Xherdan Shaqiri gekk á dögunum í raðir Liverpool en hann kemur til félagsins frá Stoke City.

Charlie Adam, leikmaður Stoke og fyrrum liðsfélagi Shaqiri, hefur nú gagnrýnt svissnenska landsliðsmanninn.

Stoke féll úr ensku úrvalsdeildinni fyrr á árinu og gagnrýndi Adam stjörnur liðsins fyrir að gera ekki nóg svo að liðið gæti haldið sér uppi.

Adam er sjálfur fyrrum leikmaður Liverpool en hann stoppaði þar stutt og þótti ekki standa undir væntingum.

,,Er hann einn af þeim sem ég er að tala um? Já alveg klárlega,“ sagði Adam í samtali við Talk Sport.

,,Þegar útlitið er svart þá horfiru til stóru leikmannana og þú vilt að þeir töfri eitthvað á tímabilinu og okkur leið eins og þeir hafi aldrei mætt til leiks og staðið sig vel.“

,,Allir aðrir hefðu getað hjálpað til en miðað við allt traustið sem stóru leikmennirnir fengu frá ákveðnum aðilum í þjálfarateyminu á síðustu leiktíð þá voru þeir ekki að bjóða upp á neitt.“