Cristiano Ronaldo er loksins mættur til Ítalíu til að ganga endanlega frá skiptum til Juventus.

Ronaldo tjáði sig um félagaskiptin í dag en hann hefur undanfarin níu ár spilað með Real Madrid.

Ronaldo viðurkennir að áskorunin sé mikil en hann er 33 ára gamall í dag og hefur unnið allt mögulegt á ferlinum.

,,Ég átti frábæran feril hjá Real Madrid, við unnum allt en núna er komið að nýrri áskorun,“ sagði Ronaldo.

,,Ég er ánægður og ákveðinn, ég vil sanna það á Ítalíu að ég sé topp leikmaður. Ég þarf hins vegar ekki að sanna neitt, tölurnar tala sínu máli.“

,,Ég vil þó ekki vera í eigin þægindarramma. Ég var hjá Manchester United, Real Madrid og nú er ég tilbúinn fyrir nýja áskorun.“

,,Þetta var auðveld ákvörðun. Juventus er eitt besta félag heims svo það var auðvelt að ákveða að koma hingað. Þeir eru með frábæran þjálfara, frábæran forseta og borgin er frábær.“

,,Ég hef verið heppinn á mínum ferli og ég hlakka til að byrja hérna. Þetta er erfið áskorun en hvað á ég að gera? Sitja heima hjá mér?“