Víkingur Reykjavík nældi í þrjú mikilvæg stig í Pepsi-deild karla í dag er liðið fékk ÍBV í heimsókn.
Nikolaj Hansen gerði tvö mörk fyrir Víkinga í 2-1 sigri en Gunnar Heiðar Þorvaldsson gerði eina mark gestanna.
Hér má sjá það góða og slæma úr leiknum.
Plús:
Fjör í byrjun leiks og fjör í byrjun síðari hálfleiks, það einkenndi þennan leik svolítið.
Gunnar Heiðar Þorvaldsson, sá er með þetta! Markið sem hann skoraði var geggjað. Lyfti boltanum snyrtilega yfir Larsen í marki Víkings viðstöðulaust.
Víkingar fengu aðeins eitt mark á sig í dag sem er batamerki. Vörn liðsins hefur míglekið í undanförnum leikjum.
Halldór Páll Geirsson var frábær í markinu hjá ÍBV í dag. Átti í raun ekki skilið að tapa þessum leik miðað við frammistöðuna.
Fyrsti sigur Víkinga síðan í lok Apríl. Það er ákveðinn léttir fyrir Loga Ólafs og hans lærisveina.
Mínus:
Nikolaj Hansen gerði tvö mörk í dag og fagnaði með svokölluðum „Fortnite“ dansi. Er ekki komið gott af þessu? Fer að minna á dabið!
Mætingin var ansi döpur. Rétt yfir 600 manns mættir á völlinn, maður vill sjá meira en það.
Það var oft eins og ÍBV væri 5-0 yfir í þessum leik miðað við hvernig leikmenn spiluðu. Nenntu ekki að elta marga bolta og þá sérstaklega í fyrri hálfleik.